老鼠喂到大过猫 东方踢爆急做嘢

鼠患问题一直困扰及肆虐本港各区，呢！最近又再发现一宗人类感染大鼠戊肝个案，更系今年首宗，涉及一名居于何文田、有长期病嘅年轻男子。本报一直警惕及促请政府、各界小心鼠患及可能引发嘅公共衞生危机，无奈老鼠依然随处见，而本港自2018年首次发现大鼠戊肝感染个案，至今共录得18宗，又系世界第一！

各位，本报日前独家报道屯门山景邨惊见妇人喂硕鼠，吸引群鼠奔跑蜂拥抢食，场面吓人！古代妇人养蚕织丝就听得多，宋时又有《蚕妇吟》一诗，唔通时代唔同，妇人唔养蚕转而养老鼠？本报编辑又够啜核，大字起题：一样米养百样人，屯门妇喂老鼠群！疫慌年代，搞出个「爱在鼠疫蔓延时」，咁就多得佢唔少咯！

呢嗱！本报记者追贴有关新闻，寻日一早重返现场，但见该鼠群奔跑嘅「觅食乐园」已加设一围栏，食环署及物业管理处都派员到场视察，并有清洁工喺附近清洁环境。咁都好，起码经本报头版报道，有关方面都真系做嘢！现场所见，除咗加贴多张告示，呼吁市民切勿喂饲雀鸟及猫狗外，亦放置多盒老鼠毒饵，管理处亦安装闭路电视作24小时监察录影。多管齐下，希望啲人咪咁有「爱心」，又走嚟喂老鼠！

有关措施刚开始，成效有待跟进。之不过，据屯门区议会主席表示，佢哋就本报嘅报道采取行动，有关人员已成功捉咗7只老鼠！可见灭鼠亦事在人为。记者喺附近草丛间，依然见到有老鼠出没，神态自若，毫不怕人，相信灭鼠仍需努力！现场但见贴上唔同告示，呼吁市民「切勿喂饲雀鸟及猫狗」，以及「预防感染禽鸟疾病，切勿喂饲野鸟」；之不过，就未见有就喂鼠作出呼吁及警告。

计功夫茶认为，有关当局应该就有妇人喂老鼠作出警告，精准打击喂鼠妇人，并通过广泛宣传喂鼠对公共衞生造成嘅灾害，分分钟比喂白鸽、流浪猫狗、野猪严重，皆因老鼠愈多，爆发大鼠戊肝及鼠疫嘅机会愈大！何况人类感染大鼠戊肝嘅确实传播途径尚未明，且目前并无针对大鼠戊肝病情嘅药物。仲有吖！老鼠嘅排泄物或身上嘅鼠蝨，可以传播多种细菌及病毒，包括汉坦病毒及沙门氏菌等，甚或诱发多种并发症。通过宣传和教育，等啲喂鼠妇人明白乜叫做「好心做坏事」！

有大律师话斋，新修订嘅《野生动物保护条例》早前生效，犯者最高可被罚款一万个大洋，不过老鼠不属野生动物，喂饲者只可以「乱抛垃圾」检控之，定额罚款1,500个大洋！嗱！是否再修例罚啲爱心爆棚嘅喂鼠人，大可再商榷！目前系一见有人喂鼠，点都要整张千五银定额罚款佢叹吓，相信都可以收到一定效果！否则有法不执即系废！


转载说明:本文转载自USDT交易平台。